★★ स्तुति श्री करणी माँ की ★★
।। दोहा ।।
।। दोहा ।।
करणी घण करणीकृपा , धरणी उर धणियाप ।
माँ करणी मोटा धणी , माँ करणी मां बाप ।।
चार धाम करणी चरण , सह तीरथ सिरमोड़ ।
पद करणी चख परसता , पातक कट करोड़ ।।
।। छन्द :— नाराच ।।
नमो अनन्द कन्द अम्ब , मात मैह नन्दिनी ।
निकन्द फन्द दास द्वन्द, विश्व सर्व वन्दिनी ।।
कृपा निधाण किन्नियांण , बीस पाण धारणी।
नमा धिराण दैशणोक, तीन लौक तारणी ।।
माँ,सर्व काज सारणी ।।१।।
बिराज माण थाण आप, धाम यू देशाण में ।
दिपायमाण भाण जेम , भौर आसमाण मे ।।
सुताज मेह तू सदव , नैण नैह धारणी ।
नमा धिराण दैशणोक , तीन लोक तारणी ।।
मॉ , सर्व काज सारणी।।२।।
नयन्न नैह न्हाळ मॉ , निहाळ बाळ न करे ।
मिटाण शूल पात केत , शूळ हाथ में धरे ।।
दया अपार बार बार , दास हेत धारणी ।
नमा धिराण दैशणोक , तीन लौक तारणी ।।
मॉ, सर्व काज सारणी।।३।।
महा समन्द मायने त , दास जोय डूबता।
बधाय माय बाहं बाय, दूध गाय गाय दूवता।।
करी सहाय छिन्न माय, नाव से निकारणी ।
नमा धिराण दैशणोक , तीन लौक तारणी ।।
मॉ, सर्व काजसारणी ।।४।।
पसार पाण किन्नियाण , दास ने उबारता ।
समन्द नीर भींज चीर , नाव तीर सारता ।।
निचोर चीर सीर नीर , धाम भौम धारणी ।
नमा धिराण दैशणोक , तीन लोक तारणी।।
मॉ , सर्व काजसारणी।।५।।
करी पुकार बार बार , राव शैख राज ने ।
उबार मोय बैग आज , सार दास काज ने ।।
दया अपार चित्त धार , शिघ ही सिधारणी।
नमा धिराण दैशणोक , तीन लोक तारणी ।।
मॉ , सर्व काज सारणी ।।६।।
छुडाण कैद शैख हैत ,शैत होय सॉवळी ।
भरी उडाण आसमाण ,आप हो उतावळी ।।
छुड़ाय लाय सिन्ध जाय ,कैद मुक्त कारणी ।
नमा धिराण दैशणोक , तीन लोक तारणी ।।
मॉ , सर्व काज सारणी।।७।।
बहन्त मग्ग बीच पग्ग , चोथ घघ्घ टूटयो।
अलग्ग होय संग सग्ग , रिन्द माय छूटियो ।।
न जोय के अधार कोय , तोय ने पुकारणी ।
नमा धिराण दैशणोक , तीन लौक तारणी ।।
मॉ, सर्व काज सारणी।।८।।
सुणी अदैर , दास टैर , चित्त म्हैंर ,सौचगी ।
करी न दैर,पाव प्हैर,छौड़ शैर , पौछगी ।।
सरूप धार , तू सुथार , कष्ट सर्व , टारणी ।
नमा धिराण दैशणोक , तीन लौक तारणी ।।
मॉ ,सर्व काज सारणी ।।९।।
बिकाण पे चढाण आण, की अचार कामरो ।
करी पुकार जैत कैत , आप शर्व आ परो ।।
दयाळ दास हैत तू , बडापणो बिचारणी ।
नमा धिराण दैशणोक, तीन लोक तारणी ।।
मॉ, सर्व काज सारणी।।१०।।
अखन्ड जोत , मंढ होत , बौत जैत बिनवै।
बिकाण री धिराण आज, जाय लाज तो थवे ।।
दया निधाण मंढ माण, पाण ने पसारणी ।
नमा धिराण दैशणोक , तीन लोक तारणी ।।
मॉ, सर्व काज सारणी ।।११।।
कबाण पे चढ़ाव बाण , बाण आप बोलियां।
नचीत जीत होय तोय हार होय केवियां ।।
हुँ साय होय जंग तोय , संग में सिधारणी ।
नमा धिराण दैशणोक , तीन लौक तारणी ।।
मॉ , सर्व काज सारणी ।।१२।।
खपाण खोज मलैच्छ फौज, चित्त चोज तू चढ़ी।
भरी हुँकार खाय खार, शूल धार ने बढ़ी ।।
हजार शीश हेक लार , वार तुर्क मारणी ।
नमा धिराण दैशणोक , तीन लौक तारणी ।।
मॉ, सर्व काज सारणी ।।९३।।
कृपा अपार जैत हैत , केत खैत तू करी ।
खळा दळा दिया खपाय , कन्ध ब्राज कैसरी।।
नमा धिराण दैशणोक , तीन लौक तारणी।।
मॉ, सर्व काज सारणी ।।१४।।
कृपा निधाण तो समान , कौण हे जहाण मे ।
मिटाण बंक अंक मूळ , पूर्ण आप पाण में ।।
महा समर्थ बीसहथ्थ , दास हित्त कारणी ।
नमो धिराण दैशणोक , तीन लौक तारणी ।।
मॉ, सर्व काज सारणी।।१५।।
सुणन्त टैर आ अदेर, जौर जंग माय ने ।
भरैज नीर भोप घैर , माट शीश लाय ने ।।
दया निधान ऐम कोन , दास दुख्ख हारणी।
नमो धिराण दैशणोक , तीन लौक तारणी ।।
मॉ , सर्व काज सारणी ।।१६।।
महा समर्थ , बीसहथ्थ, दास शीश धारिये।
शिशू अबौध जाण मोद, नैह सू निहारिये ।।
रखाय मोय शर्ण राज(हे) लाज री रूखरणी ।
नमो धिराण देशणोक , तीन लौक तारणी ।।
मॉ, सर्व काज सारणी ।।१७।।
पसार पाण किन्नियाण , आण शर्ण तो गही।
सहाय माय तो सिवाय कोय नाय मो मही।।
सदा हि दास शर्ण जाण जन्म, ‘जै‘ सुधारणी।
नमो धिराण दैशणोक , तीन लौक तारणी ।।
मॉ , सर्व काज सारणी ।।१८।।
★★ दोहा★★
आस काँई उण री करू, हे जिण रे दो हाथ।
मैं लीधी जिणरी शरण, (वो) बीसभुजाळी मात।।
मां करणी म्हॉरे धणी, हूँ करणी रो दास ।
धरणी पर करणी सिवा , करू न किणरी आस ।।
'क' कहता किरपा करे,'र' कहता रिछपाळ।
'नि' कहता निरभय करे , सारा संकट टाळ।।
:— ..
